Ning Ngisor Ringin, Tambah Iyup

Berita Apik 

Sore iku warunge Yu Tik, ora koyo biasane rame wong marung do ngopi, mapak angslupe srengenge ning kulon. Masyo warung ndeso, ning nek urusan fengshui utowo toto bangunan, dipikirno tenan karo Yu Tik. Warunge Yu Tik pancen wes pindah ning njero desa, tapi lokasine asri, strategis lan pemandangane apik, tur iyup.

Nanging mergo usum kegiatan agustusan iki, warunge Yu Tik dadi rodo sepi, mejo kursi biasane kebak, dinggo njagong, sinambi main hape ndelok youtube, instagram lan sak panunggalane, mergo Yu Tik ugo ngekei fasilitas wifie, jeneng akses akune Warung@Yutik, password e rondoroyal24.

Mumpung sepi, Yu Tik resik - resik latar warunge karo disiram - sirami banyu, nggo ngilangi bleduk. Gak gantalan suwe teko rombongan numpak Minibus, disopiri Dhe Sumar, mandhek jegrek ning ngarepe Yu Tik, sing kaget entek atine, rumangsane awake meh disruduk minibus telung prapat.

"Sori - sori Yu...saking senenge atiku, nganti ngepot pingin ndang tekan warungmu, ngopi karo mangan rondo royalmu, dino iki pancen lagi apik Bosku Yu, ndang gawekno kopi 7 karo gorengan telung piring yo," aloke Dhe Sumar marang Yu Tik sing mbesengut, dengkule koploken koyok ngerti demit.

Tambah Iyup

Sore iku Dhe Sumar sak rombongan pancen lagi wae teka ko Semarang, nderekno Bose Wedok njupuk rekome Partai Beringin, sak suwene dienteni, merga wingenane gak.mbukak pendaftaran Calon  Bupati lan Wakil Bupati, mergo Ketuane pingin munggah dewe, utowo dijak munggah dadi calon nomer 1 opo nomer 2.

"Lha yo, akhire ringin melok awak dewe yo Dhe, sawangane asri tambah iyup, mergo dipayoni wit ringin sing gede tur ngrembuyung godhonge, Bose tambah kuat pokoke iki," aloke Lamdaling.

Kancane Lamdaling, Heri Jlitheng melu nambahi, muja muji taktike Bose sing tenang, ora grusa grusu, gak gampang kepincut lan ora geter ditekan kono kene, amergo pancen kudu pinter angon sikon, amrih pie carane entuk dekengan pusat. 

"Ndilalah Bose awak dewe pancen pinter ngemong roso, ngemong kahanan, bola bali digudak wartawan.ditekoni calonan, jawabane mung rung mikir, jek neruske gawean mbangun negara, tur akeh.sing kepengin digandeng awake dadi wakile Bose, panggah ora gigrik, pokoke ngenteni dekengan pusat jarene Bose, akhire entuk wakil sing duwe dekengan.pusat tenan," aloke Heri Jlitheng.

Partai Wit Ringin

Siji mboko siji podo melu nyengkuyung Bose Dhe Sumar supoyo dadi maneh, sampek ono pitung Partai sing ngekei rekom, terakhir Partai Wit Ringin, masiyo lagi gonjang - ganjing mergo.Ketua Umume mundur mendadak. Tur maneh Ketuane Partai Wit Ringin ning Kabupaten iki, wis gak nduwe doyo kanggo maju Pilkada, mergo.gak ono sing gelem melok mbarengi utowo gawe koalisi nyukupno syarat pendaftaran.

"Nek.saiki jelas, Partai Ringin wes bener melok awake dewe, tur iku pancen direkomke ning pusat ogh, ora teko Ketua DPDne utowo Ketua DPWne, tendangane wes bener, ning gawange musuh, ora gol bunuh diri, Insya Allah musuhe Bose enteng, opo neh partai ringin melok, tambah iyup to" aloke Dhe Sumar. 

"Seneng yo seneng tapi ojo marai jantungku coplok ah, lha wong lagi nyapu kok meh disruduk mobil ngunu iku pie, ojo euphoria berlebihan ah, tetap tenang, mengalir saja koyo banyune kali, tenang tapi menghanyutkan koyo Bosmu iku lho, slowly but sure, silent tapi cak cek" aloke Yu Tik, alus tapi ngampleng. (Rome)