Dhe Sumar sing nunggoni warung, kanthi ati - ati banget nakoni wong - wong mau, ono sing lungguh karo nutupi bathuke, ono sing lagi nggremeng, karo nompo telpon mboh teko endi, ono maneh sing langsung ambruk ning kursi dowo, raine ditutupi stopmap ijo, pokoke sawangane gak pinuk, suloyo kabeh.
Gak gantelan suwe, teko Mas Momon karo kancane, sing ugo lagi bar moro kantor ning Kabupaten. Raine abang ireng, matane mlolong, dasare yo mondol pisan, ketok pucet lan lemes, lambene disumpeli udut, koyok banteng keluke metu ning irung.
"Piye iki mas Momon, sido cair pora? kok beritane koyok ngono, ngenteni opo neh, bar tandatangan kontrak kok durung iso mulai nggarap, ono opo iki, lagi lelang ae entek duik akeh lho?" takone Lik Mugik, kontraktor gede, sing menang proyek dalan udokoro Rp 5 milyar gedene.
Mas Momon sing ugo lemes awake, yo suarane, nyauri nek awake yo podo apese, bar menang lelang mbangun jembatan limang nggon, teko Kantor PUPR, sing totale Rp. 3,5 Milyar, tapi urung jelas kapan entuk Surat Perintah Kerja (SPK), jarene nunggu surat persetujuan teko Menteri Keuangan sik.
"Aku dewe yo lemes ngene kok Lik, bar teko kantor PU iki mau nakokno SPK, jarene rung dadi, ijek nunggu tandatangan Kepala PUPR, wonge iki jek ning Jakarta, mungkin telung dino ngkas lagi balik, athah - athah lha trus sok kapan mergawene, jarene nunggu surat teko Menteri Keuangan, lha menterine iki yo lagek suloyo, omahe bar dijarah, wes lempok iki pokoke," saure Mas Momon.
Jan - jane iki ono opo yo, kok ketone proyek tahun iki mawut kabeh, kamangka iki wis wulan september lho, lelang proyek sing dianggari teko utang daerah rong atusan milyar, kok gak iso mulus mlakune koyok mbiyen? Opo sing mbiyen durung lunas tah pie, takone Dhe Sumar ning njerone ati, karo ngelungno kopi sak jaminane gorengan gedang, tahu tempe lan rondho royal ning rombongan iku.
Ndilalah ketekan Om Law, sak rombongan sing ugo batal ngurus perkoro ning Polres, mergo mungsuhe ora gelem teko. Wes klop dino iku, dino jembik kanggo kabeh wong, tapi dino pokji kanggo Dhe Sumar karo Yu Tik, sore - sore warunge kebek wong pengen ngopi, karo rembugan kedadeyan sedino iki.
"Ya sudah, kalo mereka gak mau hadir untuk dikonfrontir hari ini, berarti ditunda lagi nih prosesnya minggu depan, ini iktikadnya nggak bagus sana, pokoknya kita bertahan saja, jangan mau berhenti, atau cabut perkara kalo mereka iktikadnya gak baik," aloke Om Law karo kliene.
Ngerti Om Law teka, lan ketoke yo suloyo, Mas Momon sak kancane langsung nyedaki, amul sak mejo, kepengen konsultasi hukum karo Om Law. Mas Momon langsung ngundang Dhe Sumar, kon nyiapno kopi sak jajan gorengane rong piring kanggo njagong.
"Wah kebeneran Om Law ning kene, saya mau konsultasi boleh ya Om, pokoke beres ini tak traktir semua deh, kita mau minta advisnya Om Law, gimana proses hukumnya lelang yang sudah kontrak, tapi kalo ternyata karena ada sesuatu hal, semua lelang dibatalkan, karena uang pinjaman daerah yang buat anggaran itu, gak bisa cair?" takone Mas Momon serius tenan.
"Oh itu, ya aku dengar itu, ya menurutku kalo memang gak ada uangnya, semua bisa dibatalkan, jadi programnya gak dijalankan, apakah bisa dituntut pidana atau digugat perdata, tinggal melihat kondisinya, kalo proyeknya batal, karena uangnya tidak ada, ya tidak masalah, toh Pemerintah belum keluarkan dana, lha kalo perdata, itu gini, kontraktor sudah kerjakan sampai selesai, tapi pembayarannya kurang, itu bisa digugat perdata, lha kalo pidana begini, tapi ini kategorinya pidana umum ya, kalo kontraktor dijanjikan suatu proyek, dengan membayar sejumlah uang pribadi atau perusahaan, ternyata proyeknya nggak ada, atau batal, maka itu bisa masuk pidana, kalo gak segera dikembalikan," omonge Om Law, nganggo bahasa Indonesia, maklum Pengacara.
"Aku dewe yo heran ogh Om, mbiyen pinuk lho, masiyo nganggo duit utangan Bank milik Pemerintah, sak ngertiku kok gak ono ijin Menteri Keuangan, kok saiki alesane kudu ono ijin teko Menteri Keuangan bereng, lhah iki lak malah birokrasi ngangelno uwong, jarene Pemkab kudu kreatif dan inovatif, mbiayai pembangunane, utang iki ndara bentuk kreatif dan inovatif e Bupati leh yo, kamangka, dana transfer daerah yo wes dipotong lho, ngene kok jare wes merdeka, ealah mboh, wes tak pasrahno karo Gusti Allah ae Om," aloke Mas Momon. (Rome)
0 Komentar